Eitt af okkar fyrstu augnablikum á spítalanum

MY BREASTFEEDING JOURNEY

Ahh hér er ég komin, með kannski aðeins annan tilgang en áður. Eins og þið vitið er ég ótrúlega upptekin af því að vera mamma. Já bara mamma. Uppáhalds hlutverkið mitt í heiminum og ekki datt mér í hug að mér þætti þetta svona skemmtilegt. Alls ekki bara skemmtilegt samt, líka krefjandi og erfitt. Það er tilviljun að nú stendur yfir alþjóðleg brjóstagafavika og ég ætla að segja ykkur okkar sögu og hvernig allt hefur gengið. Ég veit að þetta er alls ekki raunin fyrir allar konur hvort sem að þær reyni og það gangi ekki upp eða vilji ekki gefa brjóst þá ber ég fulla virðingu fyrir þeirra ákvörðunum en þetta er okkar saga. Ég lýt upp til allra mæðra hvernig sem þær ákveða að næra börnin sín. Áður en Erika fæddist var ég staðráðin í að hún yrði á brjósti. Örugglega eins og svo margar mömmur. Sjálf var ég mjög lengi á brjósti og mamma mín brjóstagjafarráðgjafi. Ég er alin upp í umhverfi þar sem brjóstagjöf er hinn eðlilegasti hlutur. Ég hugsaði samt alls ekki mikið um þetta á meðgöngu og kynnti mér málefnið sama og ekkert. Mér fannst duga að hlusta á mömmu og vissi að ég hefði allan þann stuðning sem ég þyrfti. Hélt að ég þyrfti ekkert námskeið eða frekari fræðslu. Ég byrjaði held ég á einni bók um brjóstagjöf og gafst upp snemma. Fyrir mér átti brjóstagjöf að koma svo náttúrulega og ég væri örugglega fullkomin í þetta hlutverk. Ég þekkti flest öll heiti á öllu og vissi af öllum hjálpartækjum sem konur þurfa mögulega við brjóstagjöf. Sem hefur reynst mér einstaklega vel.

Erika er fædd 3940 gr og 54,5 cm 9. september 2018. Eftir erfiða og langa fæðingu sem þið getið lesið um hér, var það fyrsta sem Erika gerði var að taka brjóstið. Festi sig og mig minnir að hún hafi legið þar í góðan klukkutíma. Ég hafði lekið mikið á meðgöngunni og var aðeins búin að koma framleiðslunni af stað með því að pumpa aðeins brodd framan af og frysti. Það bjargaði mér þegar við fórum heim með hana daginn eftir þar sem hún orgaði af svengd þar sem mjólkurframleiðslan var ekki alveg komin nógu mikið af stað og við gátum gefið henni með teskeið. Ég mun aldrei gleyma þessu augnabliki. Við stóðum inn í eldhúsi nýbkaðar foreldrarnir og vissum í alvörunni ekkert í okkar haus. Klukkan var orðin margt og hún orgaði af hungri og mér reyndist erfitt að koma henni á brjóstið. Ég veit ekki hvernig nóttin hefði orðið hefði við ekki náð að að gefa henni smá aukalega. Næstu dagar fóru síðan í að mastera brjóstagjöfina og komumst við mæðgur í góðan takt innan örfárra vikna. Við nutum þess heima fyrstu mánuðina og gerðum fátt annað en að liggja upp í sófa. Þessar fyrstu vikur voru alls ekki sársaukalausar en ég grét stundum af sársauka þegar hún tók brjóstið og við vorum frekar lengi að ná réttu handtökunum. Þegar allt var orðið eðilegt lá Erika á brjóstinu allan liðlangan daginn og svaf lengri dúra á nóttunni með góðum sjússum. Mig hafði aldrei grunað að hún myndi liggja svona mikið á brjósti. Ég hélt að þetta væri eitthvað sem tæki bara 20-30 mínútur og svo ekkert meir í 2-3 tima. En ekki að hún væri að drekka/sofa í stundum 3-4 klst samfleytt. Hún þyngdist vel og hratt fyrstu mánuðina enda var nóg að fá því það var svoleiðis búið að örva framleiðsluna. Ef ekki alltof mikið.

Mitt helsta vandamál í brjóstagjöf hefur verið offramleiðsla. Komst að því miklu seinna að konur sem offramleiða komast í jafnvægi miklu miklu seinna en aðrar konur og oft þurfti ég að tappa af, pumpa og losa til að forðast stíflur eftir að hún drakk. Ég held ég sé búin að ganga í gegnum yfir 20 brjóstastíflur og sumar hafa endað með sýkingu og miklum veikindum. Þær mömmur sem þekkja magn sem ungbörn drekka þá gat ég stundum pumpað 120 ml eftir að hún drakk í 20 mínútur. Þetta var ekki sársaukalaust en loksins datt þetta í jafnvægi um áramót og þá hún alveg að verða 4 mánaða. Þvílíkt og annað eins sjokk, ég hélt að ég væri að missa framleiðsluna niður og greindi sjálfa mig með “mjólkurkvíða”. Fyrir móður með yfirfull brjóst alltaf að finna mjúk og lin brjóstin þá bara trúði ég ekki að þar væri einhverja mjólk að finna. Tíminn hefur liðið og við í fullkomnu jafnvægi saman í dag og njótum við þessa tíma örugglega meira í dag heldur en við gerðum fyrst í byrjun. Hingað erum við komnar, 11 mánuðir liðnir og litla kellingin mín bráðum að vera eins árs. EINS ÁRS! Ég trúi þessu ekki. Þvílík og önnur eins vinna sem hefur farið í að “búa til” þennan litla einstakling en vá, að sjá hana vaxa, dafna og þroskast er ævintýri líkast. Þetta ferðalag ekki verið auðvelt bæði andlega og líkamlega en dýrmætt er það. Ég hlakka bara til framhaldsins og ég vona að fleiri þarna úti eigi jafn jákvæða upplifun og ég þó að þetta sé aldrei hnökralaust.

BEDROOM SETUP

Ég lofaði síðast að ég myndi ekki hverfa í svona langan tíma aftur. Staðreyndin er sú að ég er bara svolítið upptekin í móðurhlutverkinu. Mig langaði nú samt sem áður að deila með ykkur þeim breytingum sem við gerðum í síðustu viku. Það var búið að liggja þungt á mér að breyta svefnherbergisaðstöðunni. Svo hún yrði betri fyrir okkur öll og að allir fjölskyldumeðlimir færu að sofa betur. Erika var búin að sofa á milli okkar nánast frá fæðingu og öllum öryggisatriðum var fylgt og gekk það mjög vel. Nema ég svaf ekkert rosalega vel en hún gat sofið heila nótt án þess að vakna á milli okkar. Við höfðum ekki fjárfest í rúmi áður en hún fæddist og vorum með annað í láni. Mér fannst orðið tímabært að kaupa rúm handa henni sem hún myndi venjast og ákváðum við að kaupa Sebra rúmið vegna þess að það vex með henni. Þær mæður sem ég talaði við og höfðu reynslu af rúminu hafa notað það til sirka 8 ára og sluppu við að kaupa 2-3 rúm á tímabilinu. Kostnaðurinn hefði endað í því sama þó að start kostnaðurinn væri mikill. Rúmið er náttúrulega ekki bara fallegt en eins og þið sjáið get ég haft hana alveg upp við mig sem auðveldar brjóstagjöfina til muna og núna sérstaklega á meðan hún er að venjast að sofa svona sér að ég geti teygt mig í hana og strokið aftur í svefn. Rúmið er ótrúlega breitt og dýnan ótrúlega mjúk og þægileg. Þetta er mjög þægilegt svona og hreinlega sé ég eftir að hafa ekki haft þetta svona frá byrjun en ég ætla klárlega að hafa þetta svona frá degi 1 með næsta barn. Ég mæli með að kynna sér vel hvernig hægt er að gera co-sleeping öruggt en ég kynnti mér efnið vel á meðgöngu.

Sebra rúmið fæst í Petit hér

 

Færslan er unnin í samstarfi við Liewood.

LIEWOOD

Mig langar að segja ykkur aðeins frá danska merkinu Liewood sem er nú fáanlegt í versluninni Dimm. Dimm opnaði nýlega verslun í Ármúla og mig langar í samstarfi við verslunina að kynna ykkur fyrir Liewood. Liwood hefur lengi hannað og framleitt sterkar og vandaðar vörur fyrir börn á öllum aldri. Fatnað, leikföng og skrautmuni í herbergið. Vörurnar eru hver annarri fallegri og valdi ég að sýna ykkur tvær mjög skemmtilegar línur frá merkinu og þið sjáið um leið að úrvalið er gífurlegt. Ég valdi að sýna ykkur pönduna og kisuna en það eru til margar aðrar skemmtilegar og litríkar vörulínur og má til dæmis nefna rúmföt, handklæði, sokka og sokkabuxur í öllum regnbogans litum. Vörurnar eru ekki bara fallegar heldur hafa þær mikið notagildi og þar má til dæmis nefna þessa skemmtilegu púða sem má nota til að hjálpa börnum að æfa sig að sitja og nota sem púða í vagna. Leikfangahirslur, spiladósir og margt fleira fallegt sem gerir barnaherbergin að einskonar draumaheimi. Liewood hefur tekist að gera matmálstíma einstaklega skemmtilegan með vönduðum matarstellum, glösum og hnífapörum úr bambus og sílikoni. Sjón er sögu ríkari og mæli ég með heimsókn í nýja verslun Dimm í Ármúla 44 eða skoðið úrvalið á netinu hér.

Í tilefni komu merkisins í verslunina langar mig að færa tveimur heppnum lesendum 15 þúsund króna úttekt frá Liewood. Leikreglurnar og leikinn má finna á Facebook síðu Thorunnivars.is hér

 

ERIKA ANNA SAMPSTED

Litla dásemdardísin okkar fékk nafnið sitt í gær þann 30. september. Við ákváðum að drífa í skíra þar sem eiginlega öll fjölskyldan er á leið erlendis í október. Þar sem nafnið var löngu ákveðið langaði okkur ekki að bíða fram í nóvember. Dagurinn í gær var einstaklega fallegur en athöfnin fór fram heima hjá foreldrum mínum og buðum við okkar allra nánustu. Litla daman fékk nafnið Erika Anna en Eriku nafnið er út í bláinn en Önnu nafnið í höfuðið á langömmu hennar sem fór frá okkur árið 2003. Harry og hún áttu svo fallegt samband að það kom aldrei annað til greina en að skíra dóttur okkar Önnu. Amma Anna var líka svo hrifin af blómum eins og ég svo að Eriku nafnið á einstaklega vel við. Mér fannst eitthvað svo fallegt að skíra hana eftir fallegu haustblómi þar sem hún er fædd að hausti. Erika klæddist skírnarkjólnum mínum frá 89 en enginn hefur klæðst honum síðan og átti vel við að hún myndi klæðast honum enda tímalaus og fallegur. Ég hef fengið ótal spurningar um hvar ég lét gera nafnið hennar á svona kökuskraut en ég hafði samband við fyrirtækið Hlutprent sem útfærði þetta svona skemmtilega fyrir mig. Það átti vel við að skreyta borðið með erikum og allskyns blómum í tilefni dagsins.

 


Looking for Something?